Albert Veliu ishte “dëshmitari X” që rrëfeu sot të gjithë njohjen me Agron Xhafaj, vëllain e ministrit të Brendshëm Fatmir Xhafaj, se si ai kishte punuar me të në fillim të viteve 2000. Mirëpo, emri i tij rezulton se është i dënuar në Shqipëri.
Policia në vitin 2013 njoftonte edhe ekstradimin e tij nga Italia, pasi ishte dënuar nga gjykata e Vlorës në vitin 2008 me 3 vite burg për kryerjen e veprës penale të trafikimit të mjeteve motorike.
Njoftimi i policisë më 16 gusht 2013
Zyra Qendrore Kombëtare Interpol Tirana, më datën 14.08.2013, kreu ekstradimin nga Roma/Itali drejt vendit tonë të shtetasit shqiptar Albert Eqerem Veliu, vjeç 46, lindur në Vlorë.
Ky shtetas ishte shpallur në kërkim ndërkombëtar pasi Gjykata e Rrethit Gjyqësor Vlorë, me vendimin nr. 143, datë 05.05.2008, e ka dënuar me 3 vjet burg, për kryerjen e veprës penale të trafikimit të mjeteve motorike, parashikuar nga neni 141/a/1 i Kodit Penal.
Më datë 19.01.2006 policia rrugore ka bllokuar mjetin tip Volskëagen Golf, me targa JD15805. Pas hetimeve të kryera ka rezultuar se shtetasi Albert Veliu, duke falsifikuar lejen e qarkullimit të automjetit të mësipërm, e ka futur atë në Shqipëri dhe ia ka shitur shtetasit Erion H.
Si rezultat i bashkëpunimit të Interpol Tirana me Interpol Romën, ky shtetas është arrestuar në Itali, me qëllim ekstradimi drejt vendit tonë.
Në aeroportin Nënë Tereza në Rinas ky shtetas i është dorëzuar përfaqësuesve të Drejtorisë së Përgjithshme të Burgjeve.
